Trajneri i Argjentinës, Lionel Scaloni, po përgatit ndryshime të rëndësishme para përballjes së madhe me Anglinë në gjysmëfinalen e Kupës së Botës.
Sipas raportimeve nga mediat argjentinase, “La Albiceleste” pritet të zbresë me një qasje ndryshe taktike, pasi Scaloni ka testuar disa skema gjatë përgatitjeve për sfidën që do të zhvillohet në Atlanta.
Kampionët në fuqi synojnë të sigurojnë një tjetër finale të Kupës së Botës, ndërsa përballë kanë një rival historik si Anglia, me të cilën kanë zhvilluar disa nga ndeshjet më të tensionuara në historinë e futbollit.
Një nga dilemat kryesore të trajnerit argjentinas lidhet me formacionin ofensiv. Scaloni po shqyrton mundësinë e ndryshimeve në sulm, ku krahas Julian Alvarez dhe Lautaro Martinez mund të aktivizohen edhe emra si Giuliano Simeone apo Thiago Almada.
Argjentina pritet të vazhdojë të mbështetet te kapiteni Lionel Messi, i cili edhe në moshën 39-vjeçare mbetet pika kryesore e skuadrës dhe një nga futbollistët më vendimtarë të këtij turneu.
Një tjetër element që ka tërhequr vëmendjen është rikthimi i fanellës blu të errët për këtë ndeshje. Federata Argjentinase ka kërkuar që skuadra të luajë me fanellën rezervë, pasi historikisht dy fitoret e mëdha ndaj Anglisë në Kupën e Botës kanë ardhur me këtë uniformë, në vitet 1986 dhe 1998.
Në kampin anglez, trajneri Thomas Tuchel e ka komentuar me humor këtë zgjedhje, duke thënë se edhe ai beson në disa rutina dhe zakone që ndihmojnë ekipin para ndeshjeve të mëdha.
Sfida mes Argjentinës dhe Anglisë pritet të jetë një nga përballjet më të ndjekura të këtij Botërori, me një vend në finalen e madhe në lojë.
