Në skenën e futbollit shqiptar rikthehet një emër i njohur. Naci Sensoy është trajneri më i ri i Laçit, me klubin kurbinas që konfirmoi zyrtarisht arritjen e marrëveshjes me teknikun turk për të marrë drejtimin e skuadrës në Kategorinë e Parë.
Sensoy nuk është i panjohur për ambientin shqiptar. Ai ka pasur eksperienca të mëparshme në Superiore, ku ka drejtuar ekipe si Bylis dhe Kukësi, ndërsa ka punuar edhe me FC Liria në Kosovë, si dhe në klube jashtë vendit si Vihren dhe Manisaspor. Kjo bagazh i pasur pritet të ndihmojë Laçin në objektivat e tij sezonalë.
Tekniku turk vjen në vend të Stefano Senigagliesi-t, i cili u largua nga drejtimi i bardhezinjve për arsye familjare. Debutimi i Sensoy në pankinën kurbinase do të vijë më 2 nëntor, në sfidën kundër Lushnjës.
Pas nëntë javësh kampionat, Laçi ndodhet në vendin e dytë të klasifikimit të Kategorisë së Parë me 17 pikë, pesë më pak se Skënderbeu kryesues. Objektivi mbetet i qartë: të luftohet deri në fund për rikthimin në elitën e futbollit shqiptar, dhe ardhja e Sensoy synon të jetë një hap i fortë drejt këtij qëllimi.
