Lautaro Martinez ishte një nga protagonistët kryesorë të ndeshjes në transfertën e Bergamos.
Kapiteni i Interit luftoi si dem i tërbuar për çdo top dhe priti momentin vendimtar për të mbyllur llogaritë e sfidës. Ia doli që të realizonte në fund dhe tregoi objektivin që kanë në këtë sezon zikaltrit. Argjentinasi thotë se përgatitja e ndeshjes ishte sekreti.
“E kishim përgatitur ndeshjen shumë mirë dhe rikuperuam energjitë nga sfida e fundit. Atalanta është një skuadër që të bën të shpenzosh shumë energji sepse mbron një kundër një. Por ne e kishim përgatitur siç duhet dhe bëmë një punë të madhe si skuadër. Ishte fitore e merituar, sepse ishim superiorë për 90 minuta me kualitet dhe qarkullim topi. Mund të shënonim edhe më shumë gola, por 3 pikët janë të rëndësishme për klasifikimin. Duhet të vazhdojmë kështu dhe të shohim vetëm përpara”, tha fillimisht kapiteni.
TRIPLETA- Ai gjithashtu u përgjigj edhe për një temë që në kohët e fundit ka bërë shumë zhurmë në Itali, që është synimi i zikaltërve për të fituar 3 trofe në këtë sezon: Kampionat, Kupë dhe Champions.
“Ndonjëherë nuk duam ta pranojmë dhe ta themi me zë të lartë, por besojmë. Ne jemi një skuadër e fortë dhe këtë po e tregojmë në fushë. Rezultatet ndonjëherë vijnë dhe herë të tjera jo, sepse po luajmë çdo tri ditë. Skuadra është duke luftuar në të gjitha frontet. Do të jetë e vështirë, por ne do të provojmë për gjithçka. Kur zbresim në fushën e lojës, duam që të fitojmë. Ky është mentaliteti ynë prej vitesh dhe duhet të vazhdojmë në këtë rrugë”, ka thënë ai.
GENTJAN ALINANI-PANORAMASPORT.AL
