Futbollistët shqiptarë që luajnë jashtë vendit vazhdojnë të shkëlqejnë me klubet e tyre, duke qenë protagonistë me gola dhe asiste.
Nedim Bajrami shënoi gol në finalen e Kupës së Ligës, Celtic – Rangers. Futbollisti kuqezi zhbllokoi takimin në minutën e 41-të për skuadrën e Rangers. Koha e rregullt e takimit u mbyll 3-3 dhe nga penalltitë triumfoi Celtic.
Rrugën e rrjetës këtë fundjavë e gjeti edhe Taulant Seferi. Sulmuesi kuqezi shënoi në fitoren e Bodrumspor 2-0 ndaj Sivasspor. Ky ishte goli i tretë i Seferit në këtë kampionat.
Qazim Laçi ishte protagonist absolut në fitoren e Sparta Prague 2-1 ndaj Jablonec. Mesfushori kuqezi dha dy asiste vendimtarë dhe në fund të sfidës u shpall lojtari i ndeshjes me notën 7.9 nga sajti i specializuar për statistika Sofascore.
Medon Berisha u aktivizua si titullar në takimin e Lecce ndaj Monza-s. Mesfushori kuqezi zhvilloi një ndeshje shumë të mirë dhe në minutën e 3-të të takimit dha një asist spektakolar për Morente, që shënoi golin e parë të takimit. Në fund, ndeshja u mbyll me fitoren e Lecce 2-1.
Titullarë me skuadrat e tyre u aktivizuan Thomas Strakosha, Alen Sherri, Elhan Kastrati, Ardian Ismajli, Jon Mersinaj, Marash Kumbulla, Amir Abrashi, Feta Fetai, Myrto Uzuni dhe Rey Manaj. Dhanë kontributin e tyre si zëvendësues Ivan Balliu, Berat Gjimshiti, Ylber Ramadani, Arbër Hoxha, Ernest Muçi dhe Armando Broja.
