Ish-drejtori i Policisë së Elbasanit, Uljan Shpataraku, ka mohuar të ketë pasur dijeni se biznesmeni Ergys Agasi, i cili u arrestua në makinën e tij, ishte person në kërkim.
Në dëshminë e dhënë para hetuesve, Shpataraku ka deklaruar se e kishte marrë Agasin në makinë pasi ky i kishte bërë autostop në rrugën e vjetër të Elbasanit dhe i ishte prezantuar me emrin “Berti”.
Por versioni i tij bie ndesh me të dhënat e vëzhgimit policor. Sipas dosjes, makina e drejtuar nga Shpataraku është parë në orën 11:59 duke hyrë në kompleksin e vilave në Durrës, ku ishte lokalizuar Agasi.
Vetëm tre minuta më vonë, automjeti ka dalë nga parkimi nëntokësor, me një person të dyshuar si Agasi në sediljen e pasagjerit.
Makina është ndjekur deri në zonën e Plepave, ku policia ka ndaluar automjetin dhe ka konstatuar se pasagjeri ishte Ergys Agasi.
Në momentin e arrestimit, Agasit iu sekuestruan një orë “Richard Mille”, katër telefona iPhone, karta bankare dhe një çantë me shuma parash në euro.
Ndërsa Shpatarakut iu gjetën 400 euro dhe 4 mijë e 200 lekë.
/rtsh.al/
