Shqipëria në basketboll për meshkuj sërisht do të jetë në aktivitet. Bëhet fjalë për parakualifikueset e Kampionatit Botëror 2027, ndërsa shorti është hedhur të martën në Mynih të Gjermanisë. Shqipëria do të jetë në një grup prej tre skuadrash, atje ku për kundërshtar do të ketë Austrinë dhe Armeninë.
Sipas rregullores së shortit ndeshjet do të luhen në tre periudha: 19-27 shkurt 2024 ku si opsione janë 22 e 25 shkurt, 18-26 nëntor 2024 duke patur si opsion 21 dhe 24 nëntor, si dhe 17-25 shkurt 2025 me opsionin 20 dhe 23 shkurt.
Me Austrinë dhe Armeninë, Shqipëria ka luajtur dhe herë të tjera, teksa ka dalë e mundur. Ashtu sikurse ndodhi dhe në parakualifikueset e fundit të Kampionatit Europian 2025, atje ku Shqipëria u mund nga Rumania 83-87 dhe 63-72, si dhe nga Sllovakia 63-86 dhe 64-89. Megjithatë tanimë është evidente që basketbolli i djemve do të jetë përsëri në parket.
Ndërkohë tre fitueset e grupeve, si dhe e dyta më e mirë vazhdojnë në raundin tjetër të kualifikueseve të Kampionatit Botëror 2027, i cili do të zhvillohet më 2025-ën.
