Kombëtarja shqiptare e Futsallit luajti sot ndeshjen e fundit kualifikuese ndaj Danimarkës, e vlefshme për Kampionatin Europian 2026.
Në takimin e zhvilluar në sallën e sportit “Mizahir Isma” në Rahovec, miqtë triumfuan me rezultatin 3:5.
Trajneri Erind Resuli e nisi ndeshjen me këtë formacion titullar: Valdrin Mjeku (GK), Arif Limani, Arber Shkodra, Halim Selmanaj, Roald Halimi (C).
Ndeshja nisi mirë për Shqipërinë, që shënoi gol në minutën e dytë me Selmanajn.
Danimarka barazoi takimin me Falck në minutën e 10-të, ndërsa në minutën e 12-të, kuqezinjtë morën sërish avantazhin pas një autogoli të shënuar nga Kasumovic.
Danezët shënuan dy gola të tjerë brenda pjesës së parë me Oscar Hansen dhe Jorgensen. Ndërsa në fraksionin e dytë, Danimarka shënoi edhe golin e katërt me Mikkel Foged Hansen.
Shqipëria gjeti sërish rrugën e rrjetës në minutën e 38-të me Halim Selmanajn, i cili ngushtoi diferencën. Kuqezinjtë tentuan deri në fund për të barazuar rezultatin, por pa sukses.
Në fund, danezët shënuan edhe golin e pestë me Gantzhorn dhe ndeshja u mbyll 3-5.
