Skuadrën e Besës nga Dobërdolli, të dielën, e pret një udhëtim i vështirë në Kratovë kundër Sileksit.
Mbrojtësi me përvojë, Goran Siljanovski, është i vetëdijshëm për sfidën e vështirë që i pret, por premton se Besa do të tregojë lojë të mirë ndaj Sileksit të papërshtatshëm në fushë të vet. Ai thotë se nëse të gjithë lojtarët japin maksimumin, atëherë rezultati i mirë nuk do të mungojë.
“Është për të ardhur keq që u eleminuam nga kupa, por gjëra të tilla ndodhin dhe humbja është një pjesë e futbollit. Ne jemi profesionistë, duhet ta pranojmë këtë dhe tani të fokusohemi te kampionati.
Në Kratovë na pret një ndeshje e vështirë me ekipin e Sileksit. Jam i sigurt se nëse secili individ jep maksimumin, rezultati nuk do të mungojë. Shpresoj të vazhdojmë serinë e rezultateve të mira në kampionat”, u shpreh mbrojtësi Siljanovski.
Në renditjen e përgjithshme, Besa është e teta me 12 pikë, Sileksi I katërti me 17 pikë.
