Drejtori sportiv i Manchester United, Dan Ashworth, ka lënë detyrën e tij pas vetëm pesë muajsh. Disa burime me njohuri për situatën kanë thënë se Ashworth u njoftua për këtë vendim pas humbjes së United nga Nottingham Forest në shtëpi të shtunën. Lajmi për largimin e 53-vjeçarit u raportua fillimisht nga The Athletic.
Një deklaratë e klubit tha se vendimi u mor pas një marrëveshje të ndërsjellë. “Do të donim ta falenderonim Danin për punën dhe mbështetjen e tij gjatë një periudhe kalimtare për klubin dhe i urojmë suksese në të ardhmen,” thuhej në deklaratën e klubit.
Ashworth u pa duke kaluar nëpër dhomën e konferencave për shtyp me shefen e operacioneve të klubit, Collette Roche, pas ndeshjes së shtunës. Sipas burimeve, ai ishte në rrugë për në një takim ku u konfirmua largimi i tij. Ai u bashkua zyrtarisht me klubin më 1 korrik, pas pesë muajsh pushimi nga Newcastle.
