Idhulli i Flamengos ka përfunduar në sferën e drejtësisë. Pas Lucas Paquete, Brazili rikthehet për t’u marrë me bastet e futbollit: Shtëpia e Bruno Henrique, me sa duket u kontrollua këtë mëngjes nga Policia Federale me urdhër të Ministrisë Publike të Rio de Zhaneiros.
Dyshimi është se sulmuesi ka marrë një paralajmërim gjatë një ndeshjeje për të favorizuar një grup bastexhinjve, mes të cilëve edhe disa të afërm të tij.
Ndeshja në fjalë është luajtur një vit më parë, më 1 nëntor 2023: Flamengo u ndesh me Santos në Brasileirao dhe lojtari kishte protestuar shumë ashpër ndaj arbitrit, duke marrë një karton të verdhë të pashmangshëm.
Çështja u hap, pasi tre kompani bastesh sportive raportuan një rrjedhë anormale dhe të pashpjegueshme bastesh për kartonin e verdhë të 33-vjeçarit në minutat e fundit.
Sipas mediave vendase, në parim Drejtësia nuk ka ndërmend ta arrestojë, por po heton edhe një pjesë të madhe të familjes së tij, pasi njerëzit e afërt të tij investuan dhe fituan shumë para për ngjarjen.
Gjatë kontrollit u sekuestrua një kompjuter dhe një celular; Flamengo deri më tani nuk ka dhënë asnjë deklaratë zyrtare për këtë çështje dhe prania e tij në ndeshjen e radhës në kampionat, kundër Cruzeiro, është në dyshim.
