Spanja dhe Skocia po bëhen gati për përballjen mes tyre, një takim që mund të vlejë shumë për sa i përket biletave të këtyre dy skuadrave në “Euro 2024”. Në marsin e kaluar Skocia i jepte një leksion Spanjës në Gllazgou duke e mundur me shifrat 2-0.
Por edhe pse kështu, ajo ndeshja ka lënë një shije jo të mirë në radhët e skocezëve. Shkak janë bërë deklaratat e spanjollëve pas ndeshjes, ku dikush nga iberikët u ankua për lartësinë e barit, dikush tjetër për stilin antik të të luajturit të Skocisë e kështu me radhë. Skocezët e kanë etiketuar Spanjën si arrogante, duke i lëshuar sfidën përpara takimit në Spanjë nesër në mbrëmje, duke nënvizuar se Skocia do t’i japë një leksion iberikëve edhe në shtëpinë e tyre.
Konkretisht, ndihmësi i Stiv Klark ka kujtuar fjalët e mesfushorit dhe kapitenit spanjoll Rodri pas përplasjes në Skoci, duke kritikuar ashpër lojën e rivalit. “Nuk e di se çfarë kishte ndër mend Rodri me fjalët e tij. Ne kemi bërë një ndeshje të shkëlqyer dhe komentet e tyre janë të pavend. Kjo tregon mungesë respekti për kundërshtarin.
Këto janë shenja arrogance nga spanjollët. Gjithsesi ne jemi gati t’i tregojmë Spanjës se mund t’i mundim edhe në shtëpinë e tyre. Spanja ka ndryshuar jo pak në këto muaj, por ne nuk i kemi frikë”, tha ndihmësi i Stiv Klarkut, Xhon Karver.
PANORAMASPORT.AL
