“Lufta” për talentin e Juventusit, Matias Soule po vazhdon të nxehet pasi tani West Hami i është bashkuar Leicester Cityt dhe Romës në garën për të arritur një marrëveshje.
Sulmuesi argjentinas 21-vjeçar shkëlqeu gjatë periudhës së tij të huazimit me Frosinonen në sezonin 2023/24, duke shënuar 11 gola dhe tre asistime në 36 paraqitje. Juventusi është i gatshëm ta lë atë të largohet këtë verë në mënyrë që të financojë objektivat e tjerë, duke vendosur një çmim afro 35-40 milionë euro.
Leicester City dhe Roma janë në “luftë” për Soulen prej disa javësh, ku i pari ofron kushte më të mira për Juventusin dhe i dyti është preferenca e lojtarit, duke i lënë gjërat të hapura teksa tregu i transferimeve vazhdon.
“Tuttosport” detajon se si ka një linjë të vazhdueshme komunikimi midis Martin Guastadisegno, agjentit të Matias Soule, Juventusit dhe ndërmjetësit të tyre që po trajton negociatat me klubet e Premier Ligës.
Përfaqësuesi i sulmuesit argjentinas u pa duke u takuar me drejtorin e Juventusit, Cristiano Giuntoli në terrenin stërvitor të klubit Continassa të martën, ku u konfirmua interesimi i West Ham.
Juventusi është ende në pritje për 30 milionë euro plus shtesa për Soulen, më e lartë se oferta e fundit e Leicesterit, dhe Roma është në garë, edhe nëse ka të ngjarë të përballet me tarifat e larta të Premier Ligës.
