Anglia arriti që të kualifikohet si e para e grupit të saj, po kritikat për skuadrën dhe trajnerin Gareth Southgate kanë qenë të shumta. Me vetëm 5 pikë në 3 ndeshje “Tre Luanët” janë shumë larg asaj që pritet.
Pas ndeshjes me Slloveninë, që u mbyll në barazim pa gola, tekniku i britanikëve nuk u prit mirë nga tifozët, të cilët shfaqën hapur kritikat për numrin një të pankinës, i cili në konferencën për shtyp nuk i rezervoi komentet për ta.
“Po krijohet një situatë e pazakontë, e cila po shkakton dhe probleme në grup. Unë do të vijoj punën time, por gjeja më e rëndësishme është që tifozët të qëndrojnë pranë ekipit.
Unë nuk kam parë asnjëherë më parë që një skuadër të kualifikohet dhe të kontestohet në këtë mënyrë nga tifozët.
Unë jam krenar për lojtarët e mi dhe për atë çka ata dhanë në fushën e lojës”-tha ai.
Anglia mori vetëm një fitore me Serbinë, ndërsa barazoi 1-1 me Danimarkën e më pas pa gola ndaj Sllovenisë. Southgate beson se ekipi i tij pavarësisht se nuk mori rezultatet e dëshiruara, ka prodhuar një futboll të bukur.
“Ne kemi një skuadër që është sërish argëtuese. Besoj se lojtarët janë ndjerë mirë dhe është e rëndësishme që ne të jemi shumë të kujdesshëm tani në vijim”-shtoi tekniku.
Në anën tjetër kapiteni Harry Kane deklaroi se skuadra bëri ndeshjen e saj më të mirë në fazën e grupeve, ndonëse nuk arriti që të marrë tri pikët.
“Ishte një ndeshje e vështirë, por mendoj se ishte performanca jonë më e mirë nga të tre takimet e fazës së grupeve”-përfundoi Southgate.
