Anglia kaloi në gjysmëfinale të europianit teksa të besuarit e trajnerit Gareth Southgate eliminuan Zvicrën pas goditjes së 11-metërshave, duke qenë se koha e rregullt dhe ajo shtesë përfundoi në barazim 1-1. Tekniku i “Tre Luanëve”, u shfaq i lumtur për reagimin e skuadrës pasi ajo kaloi në disavantazh ndërsa shtoi se tashmë, ekipi i tij ia ka marrë dorën edhe goditjes së 11-metërshave duke lënë pas atë moment kur u mposhtën në finalen e europianit të shkuar nga Italia.
“Unë po e shijoj këtë periudhë, pasi përndryshe do ta konsideroja si humbje kohe. Në javët e fundit, kjo detyrë është kthyer në diçka personale. Megjithatë, për mua e rëndësishme është që skuadra lufton dhe në dy ndeshjet e fundit ka reaguar pasi ka pësuar gol duke treguar karakter dhe qëndrueshmëri. Na duhet gjithmonë të gjejmë një mënyrë për të fituar ndeshjen dhe të përballemi me gjithçka.
Penalltitë? Ishin të mira, nga katër herët e fundit që kemi goditur penallti, kemi fituar tre. Ende na “kryqëzojnë” për atë herë kur u mposhtëm, por e pranojmë. Goditjet nga pika e bardhë janë një proces më vete dhe po përmirësohemi aty. Unë jam shumë krenar për të gjithë ata që goditën penalltitë”, u shpreh Southgate.
