Ai që paralajmëron nuk është gënjeshtar. Dhe kopertina e “Marca”-s para ndeshjes kundër Italisë ishte: “Dy Ferrari kundër Italisë”. Praktikisht, Spanja po sulmonte Italinë me simbolin e saj.
Pas shumë vitesh lojë nga brenda ku anësorët e pastër dukej se rrezikoheshin të zhdukeshin, shpejtësia dhe çekuilibri i janë rikthyer skuadrës spanjolle të përfaqësuar në figurën e Lamine Jamal dhe Niko Uilliams. Të rinj, pa frikë dhe pa komplekse. Këta janë Lamine dhe Niko. I pari do të mbushë 17 vjeç në prag të finales së këtij Europiani; i dyti do të arrijë 22 vitet një ditë para finales. Ndoshta korriku është muaji i lojtarëve. Dhe nëse jo, pyesni Dimarkon dhe Di Lorencon që kanë kaluar një mbrëmje makthi.
De La Fuente vuri sërish bast për ta dhe ata nuk zhgënjyen. Di Lorenco nuk arriti për asnjë çast të gjente një mënyrë për të ndaluar Niko Uilliamsin. Anësori i Bilbaos e kapërceu vazhdimisht dhe arbitri i fali kartonin e verdhë për çdo faull që detyrohej të bënte. Nga shpejtësia dhe driblimi i tij erdhi 1-0 i Spanjës. Po kështu ka vuajtur dhe Dimarko në krahun tjetër me Lamine Jamal përballë, megjithatë jo si kolegu i tij Di Lorenco, të cilit do t’i dalë shpesh në ëndërr Niko.
PANORAMASPORT.AL
