Vincent Kompany ka rikthyer Bayern-in në versionin më të mirë, atë që me Thomas Tuchel në pankinë e kishte humbur. Me belgun në stol bavarezët po thyejnë rekorde pas rekordesh ndërsa në tetë javë kampionat gjenden në vendin e parë me tetë fitore.
Por ajo çfarë befason është numri i kilometrave të përshkuara mesatarisht në një ndeshje nga Neuer me shokë. Edhe pse kemi të bëjmë me një ekip që ka shumë lojtarë me teknikë të rafinuar, klubi bavarez tregon se është një skuadër që nuk kursehet duke mbuluar të gjithë fushën.
Në këtë sezon mesatarisht skuadra e Kompany bën 121.8 kilometra për ndeshje duke marrë edhe vendin e parë në këtë disiplinë mes 18 skuadrave të Bundesliga-s. Përpara se të mbërrinte Kompany skuadra e Bayern ishte më e dobta në këtë aspekt. Nën drejtimin e Thomas Tuchel, Bayern e mbylli kampionatin në vendin e 17-të në sezonin 2023/24 me një mesatare prej 115.4 kilometrash për ndeshje. Vetëm Darmstadt kishte mundur që të bënte më keq.
