Dikur një derbi mes dy skuadrave pretendente për titull, përballja e javës së 11-të të elitës së futbollit maqedonas e gjeti Strugën në garë për kreun e tabelës, ndërsa Shkupin të fundit, duke luftuar për të shmangur fundosjen e plotë. Struganët triumfuan me rezultatin 2-1.
Ndeshja e planifikuar të luhej në stadiumin e Çairit u zhvillua në Strugë, për shkak të pezullimit të fushës së Shkupit, duke sjellë një tjetër sfidë të rëndësishme për ekipin kryeqytetas në krizë të thellë.
Struga Trimi Lum e nisi ndeshjen me intensitet të lartë dhe kaloi në epërsi në minutën e 24-të me golin e Kompaoré, i cili shfrytëzoi mrekullisht një aksion të shpejtë sulmues. Shkupi arriti të rikthehej në lojë në pjesën e dytë, kur Muarrem realizoi nga penalltia në minutën e 56-të, duke u dhënë shpresë tifozëve vendas. Situata për Strugën u vështirësua më tej me përjashtimin e Diakos, që i la miqtë mbi gjysmë ore lojë me një lojtar më pak.
Megjithatë, skuadra e drejtuar nga Bledi Shkëmbi tregoi karakter të fortë dhe vendosmëri. Pas një prekjeje me dorë në zonë, gjyqtari akordoi penallti për Strugën në minutën e 74-t, ndërsa Kompaoré u tregua sërish i saktë nga pika e bardhë, duke vulosur fitoren 1-2 dhe duke i dhuruar tripikësh të artë ekipit të tij.
Ky triumf e mban Strugën fuqishëm në garën për kreun e tabelës, ndërsa Shkupi mbetet në fund me vetëm një pikë dhe pa shenja daljeje nga kriza. Në xhiron e ardhshme, Struga do të përballet në transfertë me Makedonija GJ.P., ndërsa Shkupi udhëton në Kratovë për sfidën ndaj Sileksit.
