Kristian Pulisiç është një tjetër futbollist që mund të largohet nga klubi i tij aktual, Çelsi, për t’u bashkuar me kuqezinjtë në këtë merkato vere. Milani, siç raporton “Corriere dello Sport”, tashmë ka një marrëveshje parimore me amerikanin, por ende jo një akord me londinezët.
Xhorxho Furlani dhe Xhefri Monkada në cilësinë e përgjegjësve të merkatos kuqezi do të donin të gjenin një marrëveshje me “blutë” për rreth 15 milionë euro. Klubi i Tod Bohlit megjithatë kërkon të paktën 25.
Negociatat do të vazhdojnë deri në fund në orët e ardhshme. Stefano Pioli, trajneri i Milanit, në fakt mund të përdorë Pulisiçin në disa role: anësor i djathtë ose i majtë në sulm në 4-3-3; në të njëjtat pozicione, por edhe në rolin e fantazistit në 4-2-3-1.
Për kapitenin e SHBA-së, “Daily Mail” raporton edhe interesin e Juventusit, ndaj për këtë lojtar parashikohet një lloj derbi italian me Milanin që duket i avantazhuar, pasi mund të luajë kartën “Champions”.
PA KONTRATË – “Pulisiç është një profil i nxehtë, por duhet zbritja nga Çelsi”, shkruan e përditshmja italiane “Tuttosport”. Pasi të jetë me sukses operacioni Loftus-Çik, kuqezinjtë do të fokusohen tek anësori ofensiv.
Ideja e fundit çon drejt Adama Traoresë, për të cilin Pioli ka dhënë një vit më parë pëlqimin e tij. I sapoliruar nga një kontratë e skaduar me Uolverhemptonin, anësori do të ishte gati për një përvojë italiane pas atyre në kampionatin anglez dhe spanjoll.
“Tuttosport” bën gjithashtu të ditur se menaxheri Zhorzh Mendesh ia ka ofruar 27-vjeçarin kuqezinjve, të cilët kanë kërkuar të mendohen, pasi edhe sezoni i fundit nuk ka qenë veçanërisht mbresëlënës për spanjollin, që në 40 prezenca mes kampionatit dhe kupave, ka mundur të regjistrojë vetëm 3 gola dhe 2 asiste, teksa ka qëndruar në fushë për një total prej 1,858 minutash.
PANORAMASPORT.AL
