Tottenhami barazoi 1-1 kundër Rangers në ndeshjen e gjashtë të Ligës së Europës. Pas ndeshjes, trajneri i Spurs-ave, Ange Postecoglou, shprehu kritika të ashpra ndaj Timo Werner, i cili u zëvendësua në pushimin mes pjesëve.
“Zëvendësimi i Werner-it në pushim? Ai nuk po luante, as afër, as larg, në nivelin që duhet,’ tha australiani, duke shtuar:
“Në situatën ku ndodhemi, nuk kemi shumë opsione. Kam nevojë që të gjithë, të paktën, të hyjnë në fushë dhe të përpiqen të japin më të mirën e tyre. Performanca e tij në pjesën e parë nuk ishte e pranueshme.”
Gjatë konferencës për shtypin para ndeshjes kundër Southampton-it, Postecoglou u rikthye te kjo çështje:
“Ai (Werner) është ndërkombëtar, ka fituar Ligën e Kampionëve, është një lojtar me përvojë. Ka një nivel angazhimi që duhet të arrihet për ta ngritur ekipin. Ai nuk e arriti atë nivel. Është thjesht një vlerësim i performancës së tij. Në një mbrëmje shumë të vështirë për ne – gjë që e dinim që më parë – ai duhet të jetë më i mirë.
Ne jemi në luftë këtu. Nuk do të largohem duke u shqetësuar për egot e lënduara të njerëzve. Jemi këtu për të fituar,” përfundoi trajneri.
Këtë sezon, sulmuesi ka shënuar vetëm një gol në 19 ndeshje të luajtura. Londinezët ndodhen në vendin e 11-të në Premier League dhe në vendin e 9-të në Ligën e Europës.
