Interi është skuadra më e nënvlerësuar në finalen e Ligës së Kampionëve kundër Paris Saint-Germainit, sipas Opta Supercomputer, por disa shifra mund të jenë një ogur i mirë.
Finalja e madhe do të luhet më 31 maj në orën 21:00 në ‘BayArena’.
Ky është çuditërisht takimi i parë zyrtar midis këtyre ekipeve, por të dyja kanë arritur në finale kohët e fundit dhe kanë dalë të mposhtura.
PSG-ja humbi ndaj Bayern Munichut në vitin 2020 dhe ‘Nerazzurrët’ u mposhtën nga Manchester City në vitin 2023.
Duke pasur parasysh historinë dhe formën e këtij sezoni, Opta Supercomputer ka llogaritur se Paris Saint-Germaini ka një probabilitet prej 56.6 përqind për të fituar trofeun, krahasuar me 43.4 përqind të Interit.
Duke analizuar më shumë se 10,000 simulime, superkompjuteri beson se PSG ka një probabilitet prej 44.6% për ta fituar atë brenda 90 minutave, ndërsa shanset e Interit janë vetëm 29% në kohën e rregullt.
Megjithatë, vlen të përmendet se lojtarët e Simone Inzaghit ia kanë dëshmuar të kundërtën superkompjuterit tashmë këtë sezon.
Për shembull, pas barazimit 3-3 në gjysmëfinalen e parë me Barcelonën, superkompjuteri i dha Interit vetëm 44 përqind shanse për të kaluar tutje, pak a shumë e njëjta gjë me parashikimin për këtë finale, por ata fituan me rezultat të përgjithshëm 7-6.
Në fillim të Ligës së Kampionëve, të njëjtat llogaritje tregonin se Manchester City ishte favoriti për të fituar trofeun me 25.3 përqind, i ndjekur nga Real Madridi me 18.2 përqind dhe Interi me vetëm 10.9 përqind.
