Sylvinho beson se Shqipëria do të kualifikohet në Botëror

Selektori i Shqipërisë në futboll, Sylvinho, është përgjigjur shkurt për mundësinë e kualifikimit në Kupën e Botës që këtë vit mbahet në SHBA, Meksikë dhe Kanada.

“Patjetër”, ishte përgjigjja e shkurtër e Sylvinhos në fund të intervistës dhënë për Federatën Shqiptare të Futbollit.

Sylvinho ka folur në fillim të intervistës për ndeshjet e Shqipërisë gjatë vitit të kaluar. Ai është i kënaqur me arritjet dhe rezultatet e ekipit kuqezi.

“Pas një momenti shumë të vështirë në Letoni, më pas në shtator kemi mundur Letoninë, në tetor kemi mundur Serbinë në transfertë dhe në nëntor Andorrën po në udhëtim. Ai ka qenë momenti kur kam parë një skuadër më të matur, pas tre vjetësh që kam parë kualifikueset e Evropianit dhe një Evropian të rëndësishëm dhe të bukur”, ka thënë Sylvinho.

“Mund të them që tashmë jemi mësuar të luajmë ndeshje të rëndësishme, vendimtare, qoftë ndaj Italisë apo ndaj një skuadre pak më modeste. Këta lojtarë kanë filluar të kuptojnë dhe të luajnë ndeshje me kombëtare të rëndësishme, vendimtare. Ata kanë bërë shumë mirë, në të tria ndeshjet radhazi, nuk ka qenë e lehtë, kemi fituar dhe kjo na ka sjellë në plejof. Sipas meje, ata tre muaj kanë qenë shumë të bukur.

Ai ka komentuar edhe për Poloninë, kundërshtaren e plejofit për kualifikim në Botëror. Ndeshja Poloni – Shqipëri luhet në Varshavë më 26 mars. Finalja e plejofit është më 31 mars.

“Flasim për dy ndeshje, të gjithë vijnë aty në 100% e tyre. Herë pas here dëgjoj këtu që mund të ketë një skuadër e dobët apo të lehtë për t’u mundur. Unë si trajner që e jetoj futbollin prej një dekade, nuk jam dakord. Futbolli ka ndryshuar, shikohet çdo gjë, në 90 minuta mund të ndodhë çdo gjë. Polonia është një skuadër e fortë, e njohim mirë. Polakët kanë një proces, ne kemi një tjetër, tani do të luhet, mund të ndodhë gjithçka”, ka shtuar Sylvinho.

Polonia nuk është kundërshtare e panjohur për Shqipërinë. Sylvinho ka bërë krahasimin e përballjeve të mëhershme me polakët.

“Për futbollin, tre muaj pas ndryshon çdo gjë, tani po flasim për 2-3 vite më parë. Polakët kanë një skuadër shumë të mirë, lojtarë të mëdhenj. Pak njerëz e dinë ose e kujtojnë që e njëjta Poloni katër vjet më parë shkonte në plejof për Botërorin e vitit 2022. Ndeshjen e parë nuk e ka luajtur, sepse ishte ndaj Rusisë, por në ndeshjen e dytë ka mundur Suedinë me rezultatin 2:0. Është një skuadër me lojtarë të rëndësishëm, janë të mësuar dhe e njohin mirë fazën plejof, kanë marrë pjesë edhe në Botëror. Nga ana jonë, kemi një skuadër që është përmirësuar shumë, është një skuadër që tashmë është mësuar të luajë ndeshje të vështira, vendimtare, përveç vështirësisë, se të gjitha janë të tilla, por ndeshje vendimtare”, u shpreh Sylvinho.

“Janë 90 minuta, ku e di që duhet të gabosh sa më pak dhe që çdo gjë është e rëndësishme, pasi gabimi më minimal mund të të bëjë shumë dëm. Unë besoj shumë në skuadrën tonë, në lojtarët dhe punën tonë. Mungojnë ende 2-3 muaj, uroj të shkojmë atje me forcën tonë maksimale”.