Komisari teknik i Shqipërisë doli përballë gazetarëve për të komentuar zgjedhjet e bëra prej tij pasi publikoi pak orë më parë grupin e lojtarëve, të cilët do të kenë shansin që të sigurojnë një vend historik në play-off të Eliminatoreve të Botërorit 2026.
Sylvinho në fjalën e tij la të kuptohej se për një Kombëtare siç është ajo e Shqipërisë kriter për grumbullimin e lojtarëve nuk mund jenë minutat që marrin lojatarët në skuadrat e tyre respektive.
“Së pari dua të them se jam i lumtur që jemi në këtë pikë të Eliminatoreve ku jemi në garë për një vend në play-off. Sa i përket lojtarëve të grumbulluar mund të them se disa prej tyre mund të kenë humbur statusin e titullarit në skuadrat e tyre, por për mua ky kriter nuk vlen pasi ne nuk kemi mundësi që të zgjedhim mes një grupi prej 80 lojtarësh. Unë monitoroj 40-45 lojtarë”, arsyetoi Sylvinho.
Në këtë pikë trajneri brazilian argumentoi prezencën e Nedim Bajramit në dhe mungesën e një lojtari si Muçi. “Unë kur bëj listën e të grumbulluarve nuk shikoj vetëm momentin, por marr vendime pas një rrugëtimi 3-vjeçar. Në këto tre vite unë kam vënë re se golashënuesi më i mirë i Shqipërisë është Nedim Bajrami me 7 gola dhe mua në ndeshjet e radhës më duhen golat, prandaj e kam grumbulluar edhe pse ai nuk luan më si titullar me Rangers”, tha braziliani.
