Milani ka njoftuar zyrtarisht se nuk do të vazhdojë udhëtimin e tyre me Sergio Conceicao pas vetëm gjashtë muajsh, pasi Max Allegri nënshkroi një kontratë me ‘rossonerët’, transmeton KosovaPress..
Conceicao kishte marrë përsipër drejtimin e skuadrës nga Paulo Fonseca më 30 dhjetor me një kontratë deri në qershor 2026, por ajo gjithmonë përfshinte një klauzolë që u lejonte kuqezinjve ta përfundonin kontratën në qershor 2025 pa i paguar atij ndonjë pagë shtesë.
Kjo u aktivizua të enjten dhe njoftimi zyrtar u bë me një deklaratë në faqen e internetit të klubit
“AC Milan dhe Sérgio Conceição nuk do ta vazhdojnë udhëtimin e tyre së bashku sezonin e ardhshëm”, thuhet në deklaratë.
“Klubi dëshiron të falënderojë Serxhion dhe stafin e tij për angazhimin, profesionalizmin dhe përkushtimin e treguar gjatë kohës që kanë drejtuar ekipin e parë gjatë muajve të fundit. Familja e AC Milan ndahet nga trajneri që fitoi trofeun e 50-të në historinë e klubit, duke i uruar më të mirat në të ardhmen.”
Conceicao fitoi Superkupën e Italisë vetëm në ndeshjen e tij të dytë si trajner, duke u rikthyer nga disavantazhi 2-0 për të mposhtur Interin 3-2 në Arabinë Saudite.
Megjithatë, ai humbi finalen e Kupës së Italisë ndaj Bolonjës dhe përfundoi i teti në Serie A, duke mos arritur të kualifikohej për asnjë turne evropian.
Allegri është zgjedhur për ta zëvendësuar atë, duke nënshkruar një kontratë dyvjeçare me opsion për një sezon të tretë.
