Një futbollist shqiptar po shkëlqen në Gjermani me paraqitjet e tij! Fisnik Asllani, sulmuesi 22-vjeçar i Kosovës, ka spikatur në këtë edicion me fanellën e Elversberg ne Bundesligën 2, duke shënuar 18 gola e dhënë 9 asiste.
Djaloshi i cili vesh fanellën e Kosovës, ia ka dalë të çojë skuadrën e tij në play-off për ngjitjen në Bundesligë. Por sido që të shkojë ajo ndeshje, të ardhmen e ka të sigurt, pasi një numër i madh skuadrash të rëndësishme janë vënë në ndjekje të tij.
Lojtari është dhënë në huazim nga Hofenhajm, që nuk ka ndër mend të lërë të largohet lehtë futbollistin dhe synon që ta kthejë në bazë në përfundim të këtij sezoni. Gjithsesi, interesi për të është i jashtëzakonshëm.
“Bild” bën të ditur se për Asllanin ka shprehur interes Borusia Mynshengladbah, Verder Bremen, Frajburg, Shtutgart, Union Berlin dhe Këlni të cilët kanë kontaktuar Hofenhajm për transferimin e tij. Njëkohësisht, janë interesuar edhe Sporting Lisbona, por edhe Fenerbahçe e drejtuar nga Zhoze Murinjo dhe Anderleht ku është trajner Besnik Hasi, pa harruar edhe Lilën në Francë. Por plani i Hofejnhajm nuk ka ndryshuar, siç ka treguar drejtori sportiv Andrea Shiker.
“Fakti është se Fisniku është lojtari ynë. Nëse ai kthehet këtë verë, ne kemi një kontratë deri në vitin 2026. Padyshim që kemi pasur biseda me të. Do të mundohemi të zgjatim kontratën”, tha ai.
PANORAMASPORT.AL
