Fitorja me një gol kundër Xhenoas që riktheu 3 pikët në shtëpinë e Interit pas humbjes me Juventusin, është festuar. Por shumë pak.
Infermieria e Interit ka nisur që të mbushet sërish pak nga pak. Nëse me rikthimin e Açerbit dhe Bisekut që është më mirë (pritet rikthimi i Augustos), problemet janë shfaqur në repartet e tjera. Pa harruar faktin që Zomer do të rikthehet në mesin e marsit, emergjenca është në sulm. Interi është duke kaluar një situatë delikate me Markus Turamin, i cili vazhdon të ketë ende probleme në kavilje, ndërsa kundër Xhenoas u dëmtua edhe Hoakin Korrea.
Argjentinasi ndjeu një dhimbje në gjurin e majtë teksa po përfundonte pjesa e parë dhe ekzaminimet që do të bëhen sot do të tregojnë sa do të mungojë. Sigurisht që nuk do të jetë me Lacion dhe ndaj Napolit, edhe pse kurrë nuk ka dhënë kontribut këtë sezon me përjashtim të ndeshjes me Veronën.
Objektivi i Interit është të rikuperojë Markus Turamin. Inzagi është shfaqur optimist. Në listën e lojtarëve të dëmtuar është shtuar Davide Fratezi, që pavarësisht se ishte në pankinë trajneri tha se nuk mund ta aktivizonte për shkak të problemeve. Taremi nuk po bind, por edhe Arnautoviç nuk është një alternativë e besueshme.
PANORAMASPORT.AL
