“Zonja e Vjetër” kërkon t’i dhurojë vetes një “motor” të ri për të ardhmen. Një lojtar kombëtareje, me mentalitet fituesi. Po flasim për Sandro Tonalin, i cili ka një projekt, tashmë po kthehet në diçka reale.
Fillimisht si një ide për t’i dhënë skuadrës më shumë ngjyra italiane, e gjithashtu për të sjellë liderë të rinj, që janë gjithashtu me peshë edhe në skuadrës e Spaletit, si në fushë, ashtu edhe në dhomat e zhveshjes. Gjithashtu, për të shtuar cilësinë në mesfushë që ka çaluar shumë në këtë sezon. Emri i Sandro Tonalit është alternativa ku të gjithë drejtuesit bardhezi bien dakord. Juventusi kështu ka filluar studimin serioz, që sigurisht do të jetë i vështirë për t’u negociuar, por jo i pamundur nëse arrihet në Ligën e Kampioneve të sezonit tjetër.
Mesfushori i Njukasëllit i ka kaluar pothuajse të gjitha etapat në karrierën e tij, në një moshë të re dhe është perfekt për cilindo trajner që mund të marrë drejtimin e “Zonjës” pas Igor Tudorit. Në Torino kanë filluar të shpresojnë edhe nga fakti se pasi u shpenzuan 234 milionë euro për të blerë 12 lojtarë vjet, në merkaton e ardhshme do të ketë pak afrime, por investime që vetëm e përforcojnë organikën. Sandro Tonali mund të spostojë ekuilibrat në mesfushë.
SITUATA- Sandro Tonali është i pari në listën e Juventusit, ndërsa pas tij vjen Ederson i Atalanës. Megjithatë, bardhezinjtë kanë besim edhe sepse kanë raporte të mira me Njukasëllin, të konfirmuara pas blerjes së Loid Kelit në janar. Me këtë lëvizje, Kristiano Xhuntoli hapi një kanal të rëndësishëm komunikimi me Njukasëllin dhe që mund të shfrytëzohet edhe për Tonalin. Nuk ka ende një tratativë konkrete, por e rëndësishme sipas mediave italiane është që oferta e Juventusit të arrijë në rreth 60-70 milionë euro. Sigurisht që janë shumë para, por Juventusi duket se e ka edhe zgjidhjen. Shitjet mund ta sigurojnë atë shumë, por gjithashtu pretendimet e Njukasëllit mund të ulen nëse në negociata futet edhe emri i Duglas Luiz, i cili, edhe pse u afrua si një nga premtimet më të mëdha, deri më tani ka zhgënjyer me “Zonjën”.
Duglas Luiz vlerësohet rreth 40 milionë euro nga bardhezinjtë dhe në periudhën e tij në Angli ka shkëlqyer. Kjo gjë mund ta tundojë Njukasëllin që u interesua për mesfushorin edhe gjatë janarit. 10 gola dhe 10 asist kanë qenë shifrat e Duglas Luiz me Aston Vilën dhe Njukasëlli mund të tundohet jo pak. Por nuk duhet anashkaluar edhe “karta” Dushan Vlahoviç, i cili nuk po rinovon me “Zonjën e Vjetër” dhe mund të përfundojë në marrëveshje duke parë se pëlqehet shumë nga Njukasëlli, njësoj si disa klube të tjera të Premier Ligës.
KONTAKTET- Juventusi ka pasur disa kontakte indirekte me Tonalin dhe shpreson te fakti që ai dëshiron të rikthehet në Itali. Edhe pse është tifoz me Milanin, Tonali është i hapur për një rikthim në Serinë A, ku ka fituar titullin kampion me Milanin. Prandaj, Juventusi do të bëjë çmos për të bindur mesfushorin që të firmosë me ta.
PANORAMASPORT.AL
