Mustafë Abdullau është përzgjedhur nga trajneri i Kosovës, Franco Foda, për ndeshjen miqësore që dardanët do të luajnë muajin e ardhshëm me Norvegjinë.
Portieri 20-vjeçar është përzgjedhur nga trajneri gjerman së bashku me Arijanet Muriç dhe Visar Begaj. Abdullahu ka bërë paraqitje shumë të mira me skuadrën e U-21 të Kosovës, çka e ka bindur dhe teknikun Foda për t’i dhënë mundësinë që për herë të parë të jetë pjesë e skuadrës së parë.
Por, një paradoks ndodh me portierin e Kosovës, i cili ndonëse merret në konsideratë nga skuadra e parë e përfaqësueses dardane, te Tirana ai është kthyer në një portier të tretë. 20-vjeçari u konsiderua në fillimin e sezonit si zbulimi dhe e ardhmja e portës bardheblu, pas 13 ndeshjesh kaloi në zgjedhjen e tretë për kuadratin.
Natyrisht një situatë paksa e çuditshme, me Abdullahun, që do përfaqësojë Kosovën, ndërsa në anën tjetër është kthyer në alternativë të tretë në klubin e tij. Kosova do të luajë ndeshjen miqësore me Norvegjinë në datën 5 qershor në Oslo.
