Pjesa e parë e derbit mes Tiranës dhe Partizanit u zhvillua me ritëm të balancuar, megjithëse bardheblutë u treguan më kërkues. Tirana arriti të shënonte golin e avantazhit, por ndërhyrja e VAR-it e anuloi atë për shkak të një pozicioni jashtë loje, duke ruajtur barazpeshën në rezultat.
Pas pushimit, Partizani mori iniciativën, falë aktivizimit të Bintsuka, i cili solli më shumë energji dhe rrezik për ekipin e kuq. Goditja e shtyllës dhe disa tentime të tjera drejt portës së Selmanit treguan ngulmimin e kampionëve për të gjetur golin vendimtar.
Ndeshja dukej se po shkonte drejt një barazimi pa gola, por tensioni arriti kulmin në minutat shtesë.
Një prekje e topit me dorë në zonë i dha Tiranës mundësinë për të fituar sfidën nga pika e bardhë. Prengaj mori përsipër përgjegjësinë, por portieri Qirko u shndërrua në heroin e Partizanit, duke pritur penalltinë dhe duke shpëtuar ekipin e tij.
Derbi përfundoi në barazimin 0-0, duke lënë të hapur rivalitetin dhe tensionin mes dy ekipeve për javët e ardhshme.
