Prestigjiozja britanike “The Guardian” ka shkruar një artikull për Kosovën, duke e cilësuar si një “përrallë” drejt Kupës së Botës, pasi kombëtarja është vetëm një ndeshje larg një arritjeje historike.
Sipas artikullit të publikuar nga “The Guardian”, Kosova ndodhet shumë pranë kualifikimit të parë ndonjëherë në Kupën e Botës, duke qenë vetëm një fitore larg kësaj ëndrre të madhe.
Mediumi britanik thekson se ky rrugëtim është i jashtëzakonshëm, pasi Kosova është një nga kombëtaret më të reja në futbollin ndërkombëtar, e pranuar vetëm në vitin 2016, por që tashmë po sfidon ekipet më të mëdha të Evropës, transmeton kosovapress.
Në rrugën drejt finales së play-off-it, Kosova ka arritur fitore të rëndësishme, përfshirë një triumf dramatik 4-3 ndaj Sllovakisë, duke treguar karakter dhe forcë të madhe si skuadër.
Artikulli nënvizon gjithashtu rëndësinë emocionale të këtij suksesi për vendin, duke e lidhur me historinë e vështirë dhe krenarinë kombëtare. Një kualifikim eventual do të ishte moment historik që do të bashkonte gjithë vendin dhe diasporën shqiptare.
“Ky është një vend ku konflikti nuk harrohet lehtë. Jo shumë larg stadiumit, një stacion policie u bombardua nga NATO gjatë luftës së viteve 1998-99. Në veri të vendit, tensionet ende vazhdojnë me Serbinë fqinje” – shkroi prestigjiozja britanike.
Tani, Kosova do të përballet me Turqinë në finalen vendimtare të play-off-it në Prishtinë, ku një fitore do ta dërgonte në Kupën e Botës 2026, në një grup me SHBA, Australinë dhe Paraguajin.
Në përfundim, “The Guardian” e përshkruan këtë rrugëtim si dëshmi se gjithçka është e mundur për Kosovën, e cila është vetëm një hap larg historisë.
