Ka gjithnjë e më shumë raportime që Theo Hernandez mund të pranojë ofertën prej 18 milionë eurosh në sezon nga Al-Hilal, me Milanin të gatshëm ta largojë nga skuadra.
Burime të shumta kanë konfirmuar tashmë se kjo ofertë është në tryezë dhe se ‘Rossonerët’ i kanë bërë të ditur lojtarit se duhet të gjejë një klub tjetër, pasi kërkesat e tij për rritje page në rinovimin e kontratës, e cila skadon në qershor 2026, janë konsideruar si tërësisht të paarsyeshme.
Sipas MilanNews.it, pasi kuptoi se nuk kishte alternativa reale nga klubet kryesore europiane, Theo Hernandez tani është duke u anuar drejt pranimit të ofertës nga Superliga e Arabisë.
Al-Hilal po i ofron një kontratë marramendëse prej 18 milionë eurosh në sezon.
Ndërkohë, Milani ka marrë një ofertë nga Al-Hilal për të shitur lojtarin për 30 milionë euro, që gjithsesi përfaqëson një fitim të konsiderueshëm, duke qenë se ai u ble në vitin 2019 nga Real Madridi për 22.8 milionë euro.
Raportet janë të ndryshme për shumën e saktë, pasi Sky Sport Italia raporton se oferta mund të jetë 35 milionë euro.
Mbrojtësi i majtë po i afrohet ditëlindjes së tij të 28-të në tetor dhe këtë sezon ka kontribuar me pesë gola dhe gjashtë asistime në 49 paraqitje zyrtare me fanellën e Milanit.
