Lazio ëndërron James Rodriguez, kapitenin e kombëtares së Kolumbisë. Në lidhje me ish-futbollistin e Realit të Madridit dhe Bayern Munich foli edhe presidenti Claudio Lotito.
“Rodriguez? Të shohim… Duhet të bëjmë një sërë vlerësimesh për pagën, komisionet dhe politikën e re të klubit, duke mos u fokusuar vetëm te fakti që lojtari mbërrim me parametra zero.
Merkato jonë nuk është mbyllur. Nëse do të na jepet ndonjë mundësi, ne do e shfrytëzojmë”, thekson kreu i klubit bardhekaltër.
33-vjeçari nga Cucuta ka edhe një vit kontratë me brazilianët e Sao Paulos, teksa dëshirë e tij është të rikthehet në kontinentin e vjetër.
Rodriguez zhvilloi një Kupë Amerike fantastike, duke udhëhequr Kolumbinë e tij në finalen e madhe të turneut. E humbur 1-0 në kohën shtesë përballë Argjentinës.
Mesfushori i avancuar vendosi një rekord të veçantë me 6 asistet e tij në Kupën e Amerikës, duke parakaluar një legjendë si Leo Messi (5).
Ndërkohë, Lotito ka “blinduar” sulmuesin El Taty Castellanos, i cili pëlqehet shumë nga katalanasit e Gironës: “Taty nuk është në shitje”.
