Turi më i madh çiklistik ai i Francës nis sot me edicionin e tij të 112-të. Prej ditës së sotme deri më 27 korrik të gjithë pretendentët do të kenë një synim, të mundin super kampionin nga Sllovenia, Tadej Pogacar, në garën prej 21 etapash që do të jetë e gjatë plot 3.338 kilometra dhe që për herë të parë që prej 2020-ës do të mbahet e gjitha në tokën franceze.
Fanella e verdhë do të vendoset në javën e fundit të kësaj gare ku organizatorët kanë vendosur për garuesit ngjitje ekstreme siç është ajo e Col de la Loze, Mont Ventoux apo Peyragudes. Sa i përket disnivelit sipas llogaritjeve në total do të jetë plot 52.500 metra. Rivalët e sllovenit edhe këtë vit do të jenë emra si ai i Jonas Vingegaard, Remco Evenepoel, Primoz Roglic dhe Enric Mas.
