Futbolli serb është tronditur nga një ngjarje tragjike që ndodhi në Beograd. Ish-kapiteni i Crvena Zvezdës dhe ish-reprezentuesi i Serbisë, Dejan Milovanović, ka ndërruar jetë në moshën 41-vjeçare gjatë një ndeshjeje mes ish-lojtarëve të klubit të njohur.
Milovanovic u rrëzua papritur në fushë, në momentin që po përgatitej të godiste një këndore. Ai pësoi një infarkt të dyfishtë dhe pavarësisht ndërhyrjes së shpejtë të mjekëve, nuk u arrit të shpëtohej jeta e tij.
Klubi i Crvena Zvezdës reagoi menjëherë me një komunikatë zyrtare, duke shprehur dhimbjen e madhe për humbjen e një prej figurave më të dashura:
“Dejan ishte më shumë se një futbollist. Ai ishte bir i klubit tonë, u rrit në akademinë e Crvena Zvezdës dhe me fanellën kuqebardhë bëri hapat e parë në futbollin profesionist. Përkushtimi, grinta dhe karizma e tij lanë gjurmë të pashlyeshme te shokët e skuadrës dhe te tifozët. Përveç cilësive sportive, ai do të mbahet mend si një njeri i jashtëzakonshëm, gjithmonë i buzëqeshur dhe i gatshëm për të ndihmuar.”
Pas përfundimit të karrierës, Milovanovic mbeti pranë klubit, duke marrë pjesë në aktivitetet e veteranëve dhe duke ruajtur lidhjen e fortë me shokët e tij. Lajmi i ndarjes së tij nga jeta ka lënë një boshllëk të madh në familjen e Crvena Zvezdës dhe futbollin serb.
