Trajneri i Newcastle United, Eddie Howe, është rikthyer në punë pas një qëndrimi në spital.
Howe, 47 vjeç, u diagnostikua me pneumoni në fillim të këtij muaji, pasi ishte shtruar në spital pasi ishte ndier keq për disa ditë. Tani ai është kthyer për të mbikëqyrur punën në qendrën stërvitore.
Gjatë mungesës së tij, skuadrën e kanë udhëhequr ndihmëstrajneri Jason Tindall dhe trajneri tjetër Graeme Jones.
Klubi ka falënderuar tifozët për “urimet e ngrohta”, në një postim në platformën X.
Newcastle, që aktualisht ndodhet në vendin e pestë në Premier League, do të përballet me Ipswichin në St James’ Park të shtunën.
Howe ishte shtruar në spital mbrëmjen e 11 prillit, pasi ishte bërë e qartë se diçka nuk shkonte me shëndetin e tij, pas mungesës në konferencën për shtyp para ndeshjes, ku u zëvendësua nga Tindall.
Më 12 prill, klubi njoftoi se ai do të mungonte në ndeshjen ndaj Manchester United në shtëpi – e para nga tre ndeshjet që Newcastle do t’i zhvillonte pa të.
Gjatë kësaj periudhe, Tindall dhe Jones e udhëhoqën skuadrën drejt një fitoreje 4-1 ndaj United, një triumfi 5-0 ndaj Crystal Palace dhe një humbjeje 4-1 nga Aston Villa. Newcastle aktualisht mban vendin e fundit që siguron kualifikimin në Ligën e Kampionëve për sezonin e ardhshëm.
