Emri i Çabi Alonsos ka qarkulluar gjerësisht në ditët e fundit si trajneri i ri i Real Madrid, duke filluar nga sezoni i ardhshëm kur nga pankina e kësaj skuadre largohet Karlo Ançeloti. Vetë spanjolli ka reaguar sot për herë të parë, i ngacmuar në konferencën për shtyp para ndeshjes së kësaj fundjave të Bajer Leverkusenit të cilin ai e ka kthyer në pretendent për të fituar Bundesligën.
“Është shumë herët. Jemi në shtator, ndaj nuk është një çështje që duhet trajtuar tani”, tha ai, duke lënë kësisoj gjithçka të hapur për të ardhmen e tij, edhe pse ka kontratë deri në vitin 2026 me klubin gjerman.
Ai bëri të qartë gjithsesi se ishte plotësisht i përqendruar te ekipi aktual, duke mos menduar për të ardhmen. “Sigurisht që mbetem i përqendruar. E kemi filluar mirë sezonin dhe duhet të jem i pari që duhet të vazhdoj të jem i përqendruar”, theksoi Çabi Alonso para gazetarëve.
I pyetur më pas nëse kjo çështje mund të ndikonte lojtarët e tij, spanjolli ishte i prerë. “Ata i njohin mekanizmat e futbollit. Nuk ka qenë problem për askënd. Por nuk kemi folur për këtë temë”.
PANORAMASPORT.AL
