Nënkampionia e Superligës së Kosovës në futboll, Drita do të përballet me ekipin e madh çek, Viktoria Plzen në kualifikimet për Ligën e Konferencës.
Viktoria Plzen dhe Drita do të përballen në kuadër të raundit të dytë kualifikues në Ligën e Konferencës, shkruan lajmi.net.
Trajneri i Viktoria Plzen, Miroslav Koubek, i cili mori drejtimin e ekipit para fillimit të stërvitjeve verore tha se ata janë favoritë përballë Dritës, megjithatë ai ka shtuar se duhet kujdes, duke u bazuar në vështirësinë që kishte Slavia Praha në takimet me Ballkanin vitin e kaluar.
“Drita është në nivel të ngjashëm me Ballkanin, me të cilin Slavia kishte probleme”, tha ai për faqen zyrtare të klubit, transmeton lajmi.net.
“Ne nuk dimë ende shumë për atë ekip. Besoj se trajnerët do të na përgatisin mire. Nga mënyra se si folëm për këtë, do të thosha se jemi të kënaqur. Por sigurisht ata dolën të dytët në ligën e Kosovës, kështu që nuk mund të nënvlerësojmë asgjë”, deklaroi ai.
Ndeshja e parë në mes Viktoria Plzenit dhe Dritës luhet më 27 korrik në Doosan Arena, ndërkohë ajo e kthimit një javë më vonë në stadiumin “Fadil Vokrri” në Prishtinë./Lajmi.net/
