Anglia e ka nisur rrugëtimin e saj në kualifikueset e Botërorit 2026 me në fitore 2-0 ndaj Shqipërisë dhe me fanellën… e gabuar.
“Tre luanët” janë paraqitur në fushën e lojës me modelin e ri të “Nike” për këtë edicion, por me një ndryshim të dukshëm në krahasim me modelin që ishte prezantuar para fillimit të eliminatoreve.
Ndryshimi ishte se numri që mbanin lojtarët në pjesën e përparme, nuk ishte në qendër, por në krah të djathtë, poshtë logos së “Nike”. Shumëkush mendoi se kishte një ndryshim të dizajnit të fanellës, pasi të gjithë lojtarët përdorën këtë model gjatë ndeshjes kundër kuqezinjve.
Por e vërteta është zbuluar pas ndeshjes nga përgjegjësi i bazës materiale për “tre luanët”, Pat Frost. Nëpërmjet rrjeteve sociale, ai ka bërë të ditur se ky ishte thjesht një gabim që kishte lindur prej tij.
“E stampova fanellën e parë dhe e vendosa numrin në vendin e gabuar, ndaj pastaj m’u desh t’i bëja të gjitha në të njëjtin vend. Nga e hëna, numrat përsëri në vendin e zakonshëm”, shkroi ai në rrjete sociale, duke bërë të qartë se kishte qenë gabimi i tij që kishte sjellë këtë dizajn të papritur.
PANORAMASPORT.AL
