Nigeria ka siguruar kualifikimin në finalen e “play-off”-it të Kupës së Botës 2026, pasi mposhti bindshëm Gabonin me rezultatin 4-1 në ndeshjen gjysmëfinale të zhvilluar në Rabat.
Pas një sfide të ekuilibruar për më shumë se 70 minuta, nigerianët arritën të zhbllokonin rezultatin në minutën e 78-të, falë një goli të Adams, i cili përfitoi nga një gabim i rëndë i mbrojtësit Appindangoye. Gaboni nuk u dorëzua dhe arriti të barazonte në minutën e 89-të me Lemina, pas një goditjeje të devijuar që e la të pafuqishëm portierin kundërshtar.
Megjithatë, “Super Eagles” shpërthyen në shtesë. Në minutën e 97-të, Ejuke riktheu epërsinë për Nigerinë, ndërsa ‘ylli’ i skuadrës, Victor Osimhen, vulosi rezultatin me dy gola të shpejtë në minutat 102 dhe 109, duke i dhënë fund çdo dyshimi për fituesin.
Me këtë triumf, Nigeria siguron vendin në finalen e “play-off”-it të zonës afrikane, ku do të përballet të dielën me fituesen e çiftit Kamerun–Republika Demokratike e Kongos.
Skuadra e drejtuar nga Finidi George shpreson të sigurojë një tjetër pjesëmarrje në Botëror, pas mungesës në edicionin e fundit në Katar.
