Sot pritej një vendim historik për AC Milan dhe Serie A, por sërish… pritje. UEFA ka shtyrë zyrtarisht vendimin në lidhje me zhvillimin e ndeshjes së kampionatit italian mes Milanit dhe Comos në qytetin australian të Perthit.
Ndeshja është planifikuar për në shkurt 2026, në një periudhë kur stadiumi San Siro nuk do të jetë i disponueshëm për shkak të përgatitjeve për Lojërat Olimpike Dimërore. Kjo ka bërë që Milani dhe Como të kërkojnë zgjidhje alternative, përfshirë organizimin e sfidës rreth 15,000 kilometrave larg, në Australi – një vendim i paprecedent për një ndeshje të Serie A, përcjell ORAinfo.
Gazetarja Monica Colombo nga Corriere della Sera raportoi se UEFA ka diskutuar kërkesën e FIGC-së (Federata Italiane e Futbollit), por pa marrë ende një vendim përfundimtar. Në vend të kësaj, UEFA njoftoi se do të nisë konsultime me palët e interesuara, përfshirë tifozët.
“Komiteti Ekzekutiv i UEFA-s ka diskutuar kërkesën e FIGC-së për të miratuar mbajtjen e një ndeshjeje lige jashtë territorit të UEFA-s. Nuk është marrë asnjë vendim. UEFA do të fillojë konsultime me të gjitha palët e përfshira në futbollin evropian, përfshirë tifozët,” – deklaroi Francesco Nasato në platformën X.
Për momentin, Milani mbetet në pritje – një situatë me të cilën është tashmë i njohur, duke kujtuar edhe çështjen e pazgjidhur të stadiumit San Siro dhe bashkëpronësisë me Interin. Por përfshirja e tifozëve në këtë vendimmarrje është një sinjal pozitiv, që mund të ndikojë në favor të organizimit të këtij eventi unik. /ORAinfo/
