Bayern Munich është eliminuar nga DFB Pokal në 1/16 e finales nga hiç më pak se Saarbrucken, skuadra që bën gara në ligën e tretë gjermane.
“Bavarezët” kanë pësuar 2:1 nga Saarbrucken, përkundër se ishin të parët që kaluan në avantazh, shkruan lajmi.net.
Thomas Muller hapi serinë e golave në minutën e 16-të për Bayernin, duke lënë të kuptohet se fitorja për ta do të ishte e lehtë.
Megjithatë, bavarezët i befasoi Sontheimer që barazoi shifrat në minutën e parë shtesë të pjesës së parë.
Kur të gjithë po bëheshin gati që ndeshja të shkonte në vazhdime, Gaus realizoi golin e dytë për vendasit duke shpërthyer në festë i gjithë stadiumi.
Saarbrucken kalon në 1/8 e finales, ndërkaq Bayern Munich përfundon rrugëtimin në këtë fazë./Lajmi.net/
