Reali i Madridit ka humbur për 6 deri në 7 javë shërbimet e mesfushorit të vet, Eduardo Kamavinga.
Francezi pritej të ishte titullar në finalen e Superkupës së Europës, por ai është dëmtuar në seancën stërvitore në stadiumin “Nacional” të Varshavës. Ai ka pësuar një dëmtim në gju dhe fillimisht u mendua më e keqja. Megjithatë, siç ka bërë me dije klubi madrilen, francezi ia ka hedhur paq, duke qenë se dëmtimi i tij më pak serioz nga çfarë mendohej paraprakisht. Për fatin e mirë të tij dhe të vetë Reali, Kamavinga nuk ka këputje të ligamenteve të gjurit, por vetëm një ndrydhje.
Sipas informacioneve të dhëna nga stafi mjekësor i Realit të Madridit, mesfushori do të duhet të qëndrojë jashtë fushave për 6-7 javë dhe nuk do të kthehet në fushë para tetorit. Ai pritet të humbasë 12 ndeshje deri atëherë, duke nisur me Superkupën e Europës, 9 takime në La Liga dhe dy ndeshje në Champions. Pas ekzaminimit dhe daljes së analizave, Kamavinga ka reaguar në rrjetet sociale duke premtuar një rikthim të shpejtë në fusha.
“Jam i zhgënjyer që pësova këtë dëmtim që më bën të humbas fillimin e sezonit. Do të punoj shumë për t’u rikthyer së shpejti”, ka qenë mesazhi i Kamavingës.
PANORAMASPORT.AL
