Itali-Zvicër do të ketë një arsye më shumë për t’u parë, pasi ditën e djeshme UEFA ka zbardhur emrin e atij që do të gjykojë këtë sfidë. Përgjegjësinë do ta ketë Zimon Marciniak dhe ky emër tashmë është bërë më shumë sesa i njohur për të gjithë, ndonëse kryefjala e kohëve të fundit është “gabime trashanike”.
Për këtë mjafton të pyesësh Bajernin e Mynihut, i cili u ndje i grabitur ndaj Realit të Madridit në gjysmëfinalen e “Santiago Bernabeut”, ku pa që t’i anulohej një gol i rregullt, pasi Marciniak vërshëlleu përpara se topi i De Ligt të përfundonte në rrjetë. Në të njëjtën kohë, polaku 43-vjeçar është gjithashtu njeriu që pati luksin e të shpallurit Argjentinën dhe Lionel Mesin kampion bote në Katar (përballë Francës së Mbapesë), apo edhe finalen e Botërorit për Klube në 2023, mes Mançester Sitit dhe Fluminenses.
Marciniak e ka drejtuar Italinë në dy raste dhe ajo s’ka fituar asnjëherë: humbje 3-1 ndaj Belgjikës në vitin 2015 dhe barazim 0-0 ndaj Anglisë, në korrik 2022, takim për Ligën e Kombeve.
PANORAMASPORT.AL
