“Rrufe në qiell të hapur” për argjentinasin Papu Gomez! Në moshën 35-vjeçare, pasi kishte fituar Kupën e Botës me Argjentinën në Katar dhjetorin e kaluar,ai po përgatitej të varte këpucët në gozhdë duke u transferuar nga Sevilja tek Monza në verë, por së fundmi e gjeti veten në telashe të mëdha.
Karriera e tij duket se do të përfundojë me turp pasi rezultoi pozitiv në testin e dopingut të kryer në tetor 2022 (ndërsa ende luante për Seviljan).
Substanca e gjetur në trupin e tij ishte terbutaline, ndërkohë që Gomez, prej saj po përballet me një ndalim prej dy vitesh nga organi qeverisës botërore të futbollit. Megjithatë ai këmbëngul se është i pafajshëm dhe pritet të apelojë.
“Nuk kam përdorur asnjëherë dhe as nuk kam pasur qëllim të përdor ndonjë substancë për të përmirësuar performancën time”, deklaroi Papu Gomez, kur u pyet se si u gjet terbutalina në trupin e tij, ai shpjegoi:
“Në atë kohë djali im ishte i sëmurë dhe po merrte një shurup për kollën dhe unë duhet ta kem marrë gabimisht në një moment. Por përdorimi terapeutik i terbutalinës lejohet te sportistët profesionistë dhe në asnjë rast nuk përmirëson performancën atletike.
Gomez tha se ishte i zhgënjyer nga vendimi i nxituar i FIFA-s dhe duke shtuar se nuk e meriton një fund të tillë, ai po përgatit lëvizjet e tij të ardhshme ligjore.
PANORAMASPORT.AL
