Klubi i futbollit Union Berlin ka shkëputur reciprokisht kontratën me trajnerin e klubit, Urs Fischer, njoftoi të mërkurën klubi nga Berlini.
Fischer e mori Unionin më 1 korrik 2018 dhe në pesë sezone arriti ta sjellë klubin nga Berlini nga Bundesliga e Dytë në Ligën e Kampionëve. Unioni përfundoi i katërti në Bundesligë sezonin e kaluar, përcjell lajmi.net.
Megjithatë, Unioni ka vetëm një barazim dhe 13 humbje në 14 ndeshjet e fundit në të gjitha garat këtë sezon.
Klubi nga Berlini është në vendin e fundit në tabelën e Bundesligës me vetëm gjashtë pikë, ndërsa Unioni ka fituar vetëm një pikë në katër ndeshje në Champions League.
“Për mua personalisht, dhe ndoshta për shumicën e tifozëve të Unionit, ky është një moment shumë i trishtuar. Më dhemb shumë që nuk arritëm ta thyejmë serinë negative të javëve të kaluara”, tha njeriu i parë i Unionit nga Berlini, Dirk Zingler.
Skuadra e Unionit do të drejtohet përkohësisht nga trajneri i skuadrës së Berlinit U-19, Marko Grote, deri në emërimin e kreut të ri të shtabit./Lajmi.net/
