Nuk ka fund polemika në distancë mes ish-futbollistit holandez Rafael Van Der Vart dhe yllit të ri të Spanjës, Lamin Jamal. Komenti i ish-lojtarit mbi pantallonat e ulura të futbollistit vijoi me festimin e golit të lojtarit ndaj Holandës, e më pas edhe me thumbime në rrjetet sociale.
Van Der Vart edhe dje nuk ngurroi të thumbonte përsëri Jamal, edhe pse këtë radhë me tone më të zbutura.
“Nuk duhet të shqetësohet shumë për atë që thotë një ish-futbollist që është mjaft i shëndoshë. Publikimi i tij në Instagram nuk më shqetëson. Vetëm shpresoj që të mbetet me këmbë në tokë. Më duket një lojtar i pabesueshëm. Goli ishte me të vërtetë i një kategorie të veçantë. Një gol botëror, ashtu si lojtari. Por edhe kështu, do ta këshilloja që të mos shqetësohet shumë për një ish-lojtar mjaft të shëndoshë që thotë diçka rreth tij. Kjo nuk ka asnjë rëndësi”, tha ish-mesfushori i Realit për “Nos”.
“Ai është 17 vjeçar dhe është shumë mirë, por më shqetësojnë pak qëllimet e tij. Kur merr kaq shumë elozhe në moshën 17-vjeçare, gjithashtu fillon të mendosh që e gjithë bota po sillet rreth teje. Nëse pastaj i shton gjeste dhe mendon se je një lloj Zoti, më pas mund të shndërrohesh në një person shumë të bezdisshëm. Unë thjesht pashë që pantallonat e tij ranë pak, ishin pak si shumë të ulura poshtë, por pa i dhënë rëndësi”, tha Van Der Vart.
PANORAMASPORT.AL
