Tirana ndoshta duhet të ndryshojë objektivat në këtë sezon futbollistik. Klubi bardheblu merr goditjen e radhës pas dënimit të dhënë nga Disiplina (do t’i luajë ndeshjet e mbetura të sezonit pa tifozë). Skuadra e drejtuar nga Bledi Shkëmbi pësoi disfatë edhe ndaj Egnatias, në transfertë, në ndeshjen hapëse të javës së 12-të të Kategorisë Superiore.
Në stadiumin e Rrogozhinës vendësit prishën serinë e ndeshjeve pa fitore falë golit të Edison Ndrecës në fundin e pjesës së parë në zhvillimet e një goditjeje këndi.
Tirana pati thuajse një orë lojë për ta ndryshuar rezultatin, por Egnatia e administroi me qetësi epërsinë, duke iu kthyer suksesit në kampionat pas dy barazimeve dhe dy humbjeve.
