Nga Uruguai vjen një histori e veçantë mbi aktin e madh të bujarisë të ish-sulmuesit të Napolit dhe Paris Saint-Germain, Edinson Cavani. Futbollisti luajti një rol vendimtar në shpëtimin e jetës së vajzës së gazetarit uruguaian, Rafa Cotelo, e cila vuante nga një sëmundje kronike neurologjike.
Vajza, Ema, u detyrua një vit më parë të kryente një operacion urgjent për të shpëtuar jetën, por klinika kërkoi pagesë të menjëhershme në para, dhe Cotelo nuk kishte mundësi t’i siguronte ato shpejt. Ai i kërkoi ndihmë Cavani-t, me të cilin kishte një miqësi të gjatë dhe të fortë. Sulmuesi i Boca Juniors nuk hezitoi dhe gjeti një zgjidhje që mundësoi operacionin dhe shpëtimin e jetës së vajzës.
Pas një viti heshtjeje, gazetari Cotelo tregoi për ‘El Observador’ se Cavani dërgoi një mik të tij me paratë te klinika. Shuma më pas iu kthye Cavani-t, i cili nuk kërkoi asgjë në këmbim.
Ky veprim fisnik tregon jo vetëm zemrën e madhe të futbollistit, por edhe rëndësinë e solidaritetit dhe miqësisë në momentet më të vështira.
