Java e tetë e Serie A përfundoi me një fitore të rëndësishme për Lazion, që në “Olimpico” triumfoi 1-0 ndaj Juventusit të Igor Tudor-it. Ishte një mbrëmje e hidhur për bardhezinjtë, të cilët pësuan disfatën e tretë radhazi mes kampionatit dhe Ligës së Kampionëve, duke u larguar tashmë gjashte pikë nga Napoli dhe Roma.
Ndeshja u vendos që në minutën e 9-të. Një gabim i rëndë i David me kokë i dha mundësinë Cataldi-t të pasonte për Toma Basic, i cili goditi nga jashtë zonës dhe, pas një devijimi nga Gatti, mposhti portierin Perin. Pavarësisht përpjekjeve në pjesën e dytë dhe lëvizjeve sulmuese të Tudor, Juventus nuk arriti të gjente rrjetën.
Skuadra e Igor Tudor-it, duket se po kalon një moment delikat, me mungesë qartësie në fazën ofensive dhe gabime individuale që po i kushtojnë shtrenjtë. Ndërkohë, Lazio merr frymë lirisht pas këtij suksesi, që i jep besim dhe vazhdimësi pas një fillimi të vështirë sezoni.
