Lajm i rëndë për vrasjen e dy tifozëve suedezë para fillimit të ndeshjes mes Belgjikës dhe Suedisë në Bruksel, ka tronditur opinionin kudo. Ngjarja në fjalë solli braktisjen e ndeshjes në pushimin e saj, teksa tifozët u detyruan që të qëndronin të mbyllur brenda në impiant derisa të sigurohej shpërndarja e sigurt e mbi 30 mijë personave.
Situata më problematike ka qenë ajo e tifozëve suedezë, me rreth 200 të tillë që kishin udhëtuar për të ndjekur takimin. Shumë prej tyre kanë shpërthyer në lot pasi kanë mësuar për lajmin e rëndë, teksa ekzistonte gjithmonë paniku i mënyrës se si do të ktheheshin shëndosh e mirë në shtëpitë e tyre.
Ndërsa policia nisi organizimin e evakuimit nga stadiumi të tifozëve belgë, ata suedezë janë ftuar në ambientet e brendshme, teksa një pjesë e tyre janë sistemuar në sallën e mediave në stadium, siç shihet në videon e mëposhtme. Raportohet se familjarët e lojtarëve të të dy skuadrave të pranishëm në tribuna, janë futur në dhomat e zhveshjeve me futbollistët të cilët kërkuan t’i kishin pranë teksa prisnin edhe ata largimin nga impianti.
Sipas raportimeve të mediave lokale, atentatori ka qëlluar me armë zjarri ndaj mbështetësve suedezë në mënyrë të qëllimshme teksa ka bërë postim më parë në rrjetet sociale se ishte pjesë e ISIS dhe do të hakmerrej ndaj “të pafeve”.
PANORAMASPORT.AL
