Mançester Siti është finalisti i parë i Kupës FA në Angli, duke mposhtur 1-0 Çelsin në gjysmëfinale. Qytetarët, edhe pse të goditur nga eliminimi në Champions, gjetën forca dhe tashmë kanë mundësinë të fitojnë trofeun.
Një humbje e hidhur për skuadrën e Poçetinos, duke parë rastet e shumta të shpërdoruara nga sulmuesi i londinezëve Xhekson. Rasti më i pastër i pjesës së parë ka ardhur në minutën e 29-të dhe është krijuar nga skuadra londineze. Enzo Fernandez ka dhënë një pasim përpara për Xhekson, me këtë të fundit që ka kapur në befasi mbrojtjen e qytetarëve dhe është shfaqur i vetëm përballë portierit Ortega, por nuk ka arritur të shënojë.
Shpërdorimet e senegalezit kanë vazhduar në pjesën e dytë, me sulmuesin që është ndalur dy herë brenda pak sekondave nga portieri Ortega edhe pse ka qenë në pozicione shumë të favorshme. Rregulli i pashkruar i futbollit ‘gol i gabuar, gol i pësuar’, është verifikuar në minutën e 84-t, ku Bernardo Silva ka zhbllokuar ndeshjen një metër larg portës. Një lehtësim i madh për portugezin, i cili në mesjavë gaboi një nga penalltitë që i dhuruan kualifikimin në gjysmëfinalet e Champions, Real Madrid-it.
Skuadra e Pep Guardiolas do të përballet në finalen e Kupës së Anglisë me fituesin e Koventri-Mancester Junajtid, ndeshje që do të luhet nesër në orën 16:30 po në “Wembley”.
MANÇESTER SITI 1-0 ÇELSI
Bernardo Silva 84′
GOLI I BERNARDO SILVËS (VIDEO)
PANORAMASPORT.AL
